كتبت / دينا عبد الله
كشفت تحقيقات واعترافات إمام عاشور، لاعب النادي الأهلي، في اتهامه بالتعدي علي فرد أمن بمول أركان بالشيخ زايد والتي دار أحداثها يوم 19 يونيو الماضي، تفاصيل تعرض زوجته للمضايقة والمعاكسة على يد مجموعة من الأشخاص داخل المول، والتي زعمت فيها زوجة عاشور تباطؤ أفراد الأمن بالإمساك بهم فقامت بإبلاغ زوجها والذي حضر وتشاجر مع أفراد أمن المول رفقة صديق له وآخرين
*اعترافات زوجة إمام عاشور بواقعة التحرش بها*
قالت في التحقيقات: اللي حصل إن يوم الأربعاء أنا كنت رايحه السينما مع إخواتي وأهلي وبعد شباك التذاكر من اليمين سمعت ناس ورايا بيقولوا دي مرات إمام عاشور شكلها.. وحجم كبير وتعدوا عليا لفظيا وتحرشوا بيا بألفاظ مش كويسة.
*زوجة إمام عاشور: عاكسوني وطلعوا ورايا السلم*
وتابعت زوجة إمام عاشور لاعب النادي الأهلي في التحقيقات التي اطلع عليها دفاع إمام عاشور: بعد كدا سمعت حد بيقول للتاني تعالي وراها وطلعت على السلم الكهرباء وأخويا مشي معايا وفضلوا ورايا بيتريقوا وانا مش مركزة بيقولوا إيه واخويا مسكني من أيديا واستنيت باقي اخواتي علشان أخلي الناس اللي ضايقوني يعدوا الأول ولما أخويا الكبير جه روحنا وقفنا عند الراجل بتاع التيكت وأخدنا التيكت والشباب دي فضلت واقفة يبصوا علينا ويضحكوا ولما دخلنا القاعة مبصتلهومش وقعدوا يقولوا دي مرات إمام عاشور ويتحرشوا بيا
وأردفت زوجة إمام عاشور بالتحقيقات: فضلوا يقولوا هي دي مرات إمام عاشور الـ … وسمعت واحد قال هتروح ازقك عليها وأصورك ودخلت جوه السينما قعدت في مكاني وكلمت إمام جوزي وانا في السينما قولت له اللي حصل عشان يتصرف..
زوجة لاعب الأهلي: إمام قالنا متعملوش حاجه وهنعمل محضر
أكملت ياسمين زوجة إمام عاشور أقوالها أمام جهات التحقيق: بعد ما الشباب دول اتحرشوا بيا كلمت إمام جوزي وانا في السينما قولت له اللي حصل علشان يكلم اخويا معاذ يهدي علشان هو متعصب وفيه ناس ضايقوني وعايز يتكلم معاهم وإمام كلمه ومعاذ حكى لإمام اللي حصل وإمام عاشور قاله متعملوش حاجه وبعد السينما روحوا قولوا لمشرفين الأمن، وقال لأخويا إنه جي علشان يروح يعمل محضر.
زوجة إمام عاشور: أمن المول قالنا عادي الناس كلها بتتعاكس إحنا في عيد
أضافت زوجة لاعب الأهلي: بعد ما خلصنا سينما طلعت أنا واهلي وأخويا معاذ الصغير قال لأخويا عمر الكبير هما دول وعمر قالهم انتوا عاكستم اختي وكان معاكم واحد بجلابية وساعتها قعدوا يتريقوا ويقولولهم جلابية إيه وقعدوا يضحكوا وساعتها بتاع الأمن جه وسألنا فيه إيه.. وعمر أخويا قاله إن فيه شباب اتحرشوا بيها وشتموها ومشرف الأمن قاله عادي ومشرف الأمن قاله باستهزاء كل الناس بيحصلها كده إحنا في عيد.
*اعترافات وأقوال زوجة إمام عاشور لاعب الأهلي*
وأضافت زوجة إمام عاشور، لاعب النادي الأهلي: أخويا قال لفرد الأمن أنا عايزك تتحفظ عليهم جوزها جاي وهنعمل محضر دلوقتي وساعتها مشرف الأمن قالنا سيبوا الشباب دي إحنا هنتحفظ عليهم تحت عند مكتب مدير الأمن لحد ما زوجها ييجي علشان يعمل محضر.. وانا بعدت ومعرفش عمر قال لمشرف الأمن أيه وأنا أخدت جنب وعمر أخويا أخدني أنا وإخواتي وقالنا تعالي نطلع بره لحد ما إمام جوزي ييجي.
وقالت زوجة لاعب الأهلي خلال التحقيقات: فضلنا واقفين بره قاعدين في العربية و5 دقائق وإمام عاشور جوزي جه ومعاه واحد صاحبه اسمه محمود وأخد معاذ أخويا وسأله فين الشباب اللي ضايقوا مراتي قاله تحت عند مدير الأمن وساعتها لقيت الناس في الشارع قدام المول بتتلم وجريوا ورا إمام وقاله ده إمام عاشور وكانوا عايزين يتصوروا معاه وانا فضلت واقفة بره حوالي خمس دقائق أو عشر دقائق ولقيت إمام عاشور راجع من جوه وقالي إنه نزل تحت سأل مشرفين الأمن على الشباب اللي ضايقوني وساعتها مشرفين الأمن مشوهم.
*زوجة إمام عاشور: أمن المول هرّب العيال اللي اتحرشوا بيا*
وأضافت زوجة إمام عاشور: جوزي سأل الأمن مشتوهم إزاي ومشيتوهم ليه وساعتها واحد كان بيصور من الأمن والأمن كان بيقوله اهدى يا كابتن وإمام قاله أهدى ازاي مراتي اتعاكست ومشرفين الأمن كانوا بيضحكوا وبيقولوا لإمام إحنا مشيناهم، وقالي إن فيه واحد وقع في الزحمة وان إمام قومه وكان وصاحبه محمود إداه ألف جنيه ورضاه قدام مدير الأمن ولما روحنا كان إمام عاشور فيه كدمات في إيده وكتفه وفي وقت سابق قررت جهات التحقيق إخلاء إمام عاشور لاعب النادي الأهلي عقب الاستماع لأقواله، في واقعة التعدي على فرد أمن داخل مول أركان بالشيخ زايد، عقب تعرض زوجته للمعاكسة داخل المول.
*واقعة إمام عاشور*
وكانت جهات التحقيق استدعت إمام عاشور لاعب النادي الأهلي للاستماع لأقواله، في واقعة التعدي على فرد أمن داخل مول تجاري بالشيخ زايد، عقب تعرض زوجته للمعاكسة داخل المول.
وشهد مول أركان بالشيخ زايد، نشوب مشاجرة بين لاعب النادي الأهلي إمام عاشور، وفرد أمن بالمول بسبب معاكسة زوجة لاعب الأهلي علي يد مجموعة من الأشخاص بداخل المول وحدثت مشاجرة بينه وبين فرد الأمن بسبب رفض الأخير دخوله المول للتعدي على مضايقي زوجته.